خوێندنەوەی ئەم بابەتە ٥ خولەکی دەوێت
ئایا دەتزانی خواردنەوەی ئاو بە بڕی پێویست و بە شێوازێکی ڕێکخراو دەبێتە هۆی باشترکردنی پێکهاتە و ڕەنگی پێستت؟ چ هەواڵێک لەمە خۆشترە! پێستمان ئەو بەشەیە کە لە یەکەم نیگادا سەرنجی دەوروبەرمان ڕادەکێشێت، بۆیە کێ هەیە حەزی بە پێستێکی تەندروستتر، گەنجتر و گەشاوەتر نەبێت؟
هەموومان ئارەزوو دەکەین پێستێکی جوان، تەندروست و لاو مان هەبێت و بۆ ئەم مەبەستەش هەر کارێک پێویست بێت ئەنجامی دەدەین؛ سەردانی پزیشکی پسپۆڕ دەکەین، جۆرەها بەرهەمی چاودێری پێست بەکاردەهێنین و زۆر شتی تریش. بەڵام لەم بابەتەدا بڕیارە باسی سادەترین و کاریگەرترین ڕێگا چارەسەر بکەین بۆ تەندروستی و جوانیی پێست: خواردنەوەی ئاو!
تێرکردنی جەستە بە ئاو (Hydration) نەک تەنیا بۆ تەندروستیی گشتی پێویستە، بەڵکو سوودێکی بێشوماری بۆ پێست هەیە؛ ئاو یارمەتی سووڕی خوێن و گواستنەوەی ماددە خۆراکییەکان بۆ هەموو خانەکانی جەستە دەدات. تۆ دەتوانیت تەنیا بە خواردنەوەی بەردەوامی ئاو، ببیتە شایەدی پەرجوویەک (موعجیزەیەک) لە تەندروستی پێستتدا و لە ماوەیەکی کورتدا بگەیتە پێستێکی ڕووناک و بێگەرد.
پێرستی بابەتەکان
- سوودەکانی خواردنەوەی ئاو بۆ پێست
- نەرمی و جیڕی (Elasticity) پێست زیاد دەکات
- یارمەتی چاکبوونەوەی نەخۆشییەکانی پێست دەدات
- پێست ڕووناک و گەشاوە دەکات
- کاریگەری لەسەر کونییلەکانی پێست هەیە
- ڕێگری لە دروستبوونی زیپکە دەکات
- چرچولۆچییەکانی پێست کەم دەکاتەوە
- پرۆسەی چاکبوونەوەی سووتانی بەر خۆر خێرا دەکات
- باشترین کات بۆ خواردنەوەی ئاو
- ڕۆژانە پێویستە چەند پەرداخ ئاو بخۆینەوە؟
- چ جۆرە ئاوێک بۆ پێست بەسوودە؟
- پەرداخی ئاوەکەت پڕ بکەرەوە!
سوودەکانی خواردنەوەی ئاو بۆ پێست
لەم بەشەدا بە ٧ هۆکاری زانستی قەناعەتت پێدەکەین کە بۆچی خواردنەوەی ئاو کاریگەری ڕاستەوخۆی لەسەر جوانی پێست و تەندروستی جەستەت هەیە، و بۆچی دەبێت خواردنەوەی ئاو لە ناوەڕۆکی سەرقاڵییەکانی ڕۆژانەتدا بکەیتە کاری لەپێشینە؟
١. نەرمی و جیڕی (Elasticity) پێست زیاد دەکات
پزیشکانی پسپۆڕی پێست و کەسایەتییە ناودارەکان، چەندین جار جەختیان لەسەر گرنگیی شێدارکردنەوەی پێست کردووەتەوە. کاتێک پێستت ئاوی پێویستی پێنەگات، بە تێپەڕبوونی کات تایبەتمەندی ڕاکێشان و جیڕی خۆی لەدەست دەدات و ڕەق و وشک دەبێت. لەم دۆخەدا پێستە ناسکەکەی دەوروبەری چاو تاریکتر دەبێت و گەشاوەیی دەموچاو نامێنێت. خواردنەوەی ئاو بە بڕی پێویست، چڕی و ئەستووری پێست دەپارێزێت و ڕێگری لە لەدەستدانی شێدارییەکەی دەکات.
٢. یارمەتی چاکبوونەوەی نەخۆشییەکانی پێست دەدات
ئەو کەسانەی بەدەست نەخۆشییەکانی پێستەوە وەک (ئەکزیما) دەناڵێنن، ڕووبەڕووی کێشەی وشکبوونەوەی توندی پێست دەبنەوە و زیاتر مستعدی قڵیشان و چرچبوونی پێستن. قڵیشانی پێست دەبێتە هۆی سووتانەوە و هەوکردن کە دۆخێکی بێزارکەر بۆ کەسەکە دروست دەکات.
بە خواردنەوەی ئاوی پێویست، پێست تێرئاو دەبێت و بەرگرییەکەی بەهێز دەبێت. بێگومان خواردنەوەی ئاو ڕێگری لە تووشبوون بە نەخۆشییەکە ناکات، بەڵام هەستی خوران، توێژاڵگرتن و ناڕەحەتییەکانی پێست زۆر کەم دەکاتەوە.
٣. پێست ڕووناک و گەشاوە دەکات
خواردنەوەی ئاو سووڕی خوێن لە ناو پێستدا چالاک دەکات و لەم ڕێگەیەوە درەوشانەوە و تەندروستییەکی تایبەت بە پێست دەبەخشێت. لێکۆڵینەوەکان سەلماندوویانە کە زیادبوونی لێشاوی خوێن لە پێستدا دەبێتە هۆی یەکگرتن و گەشاوەکردنی ڕەنگی دەموچاو.
٤. کاریگەری لەسەر کونییلەکانی پێست هەیە
پیسی، مکیاج و گازە پۆخڵکەرەکانی ناو هەوا، کونییلەکانی پێست گەورەتر دەکەن و گەشاوەیی دەموچاو تێکدەدەن، کە ئەمەش سەر دەکێشێت بۆ دروستبوونی زیپکە و پەڵە. خواردنەوەی ئاو بە بڕی پێویست، پێست پڕ و قەبارەدار دەکات، کونییلەکان دادەخات و لە هەمان کاتدا هاوسەنگی نێوان چەوری و ئاوی پێست دەپارێزێت. بۆیە ئاوخواردنەوەی زۆر، کونییلەکان بچووک دەکاتەوە و ئەگەری دروستبوونی زیپکە کەم دەکاتەوە.
٥. ڕێگری لە دروستبوونی زیپکە دەکات
پێستی وشک، دەردانی چەوری (Sebum) زیاد دەکات بۆ ئەوەی قەرەبووی کەمیی چەورییەکەی بکاتەوە، بەڵام هەر ئەمەش دەبێتە هۆی دروستبوونی زیپکە. پڕبوونی کونییلەکان بە بەکتریا، پیسی و خانە مردووەکانی پێست، هۆکاری سەرەکین بۆ دروستبوونی زیپکە. خواردنەوەی ئاو یارمەتی دەرکردنی ژەهرەکان لە پێست دەدات و ڕێگری لە کۆبوونەوەی پیسی دەکات.
٦. چرچولۆچییەکانی پێست کەم دەکاتەوە
پێستی تۆ بە ئاسانی دەکرێت بەهۆی نەخواردنەوەی ئاوی پێویستەوە تووشی کەمئاوی (Dehydration) بێت. کەمئاوبوونی پێست وادەکات هێڵە وردەکان و چرچییەکان هێدی هێدی لەسەر دەموچاو دەربکەون. ئاو، پێست تێرئاو دەکات و بە پاراستنی شێدارییەکەی، یارمەتی مانەوەی گەنجێتی پێست دەدات. هەرچەندە پێست نەرمتر بێت، چرچییەکان کەمتر دەبنەوە.
٧. پرۆسەی چاکبوونەوەی سووتانی بەر خۆر خێرا دەکات
سووتانی بەر خۆر یەکێکە لەو کێشانەی کە دەکرێت تا ماوەیەکی زۆر بەئازار و بێزارکەر بێت. خواردنەوەی ئاو بە سروشتی خۆی سووتانەکە بە تەواوی چاک ناکاتەوە، بەڵام پرۆسەی نوێبوونەوەی خانەکان و چاکبوونەوەی پێستەکە زۆر خێرا دەکات. ئەگەر پێستت بەهۆی خۆرەوە سووتاوە، لەگەڵ بەکارهێنانی کرێمە تایبەتییەکان، حەتمەن ئاوی زۆر بخۆەرەوە.
باشترین کات بۆ خواردنەوەی ئاو
ئێستا کە خواردنەوەی ئاوت خستووەتە بەرنامەی ڕۆژانەتەوە، باشترە سەرنج بدەیتە کاتەکانیش. باشترین کات بۆ ئاوخواردنەوە پێش هەستکردنە بە تینوێتی؛ چونکە کاتێک هەست بە تینوێتی دەکەیت، واتە جەستەت لە بنەڕەتدا ئاوی کەمیکردووە و ئەو ئاوەی دەیخۆیتەوە تەنیا بۆ قەرەبووکردنەوەی کەمئاوییەکەیە. جگە لەمەش، هەوڵبدە هەموو ڕۆژێک بەیانیان زوو دوای لە خەو هەستان، لە درێژایی ڕۆژدا پێش یان دوای نانخواردن ئاو بخۆیتەوە.
ڕۆژانە پێویستە چەند پەرداخ ئاو بخۆینەوە؟
بەگشتی پێشنیار دەکرێت کە پیاوان ڕۆژانە ٣.٧ لیتر و خانمان ٢.٧ لیتر ئاو لە ڕێگەی جیاوازەوە (خواردنەوە، خواردنی میوە و سەوزە) بگەیەننە جەستەیان. بەڵام ئەگەر ژماردنی بە لیتر بۆت قورسە، بەبێ گوێدانە ڕەگەز، ڕۆژانە ٨ پەرداخ ئاو وەک یاسایەکی گشتی بخەرە بەرنامەی خۆتەوە.
ئەگەر تۆ لەو کەسانەیت کە ئاوخواردنەوەت بەلاتەوە قورسە، ڕێگایەکی سادەت پێ دەڵێین: دەتوانیت ئاوەکەت تاتدار بکەیت (Detox Water). گەڵای نەعنا، پارچەی لیمۆ، خەیار یان زەنجەبیل بخەرە ناو دەفر یان مەتەرێزی ئاوەکەتەوە. ئەم شێوازە هانت دەدات زیاتر ئاو بخۆیتەوە و لە ماوەیەکی کورتدا گۆڕانکاری گەورە لە پێستتدا دەبینیت.
چ جۆرە ئاوێک بۆ پێست بەسوودە؟
پێشنیار دەکرێت ئەو ئاوەی دەیخۆیتەوە ئاوی شلەتێن (ولرم) بێت، چونکە نەرمترین و گونجاوترین بژاردەیە بۆ تێرکردنی خانەکانی پێست و گەدە، و نابێتە هۆی گرژبوونی دەمارەکان وەک ئاوی زۆر سارد. هەروەها تەندروستترین ئاو بۆ خواردنەوە ئەو ئاوەیە کە ئاستی ترشێتی و تفتێتییەکەی (pH) لە نێوان ٦.٥ بۆ ٨.٥ دابێت.
پەرداخی ئاوەکەت پڕ بکەرەوە!
ئاو ماددەیەکی جادوویی و مەیەی ژیانە. دابینکردنی ئەم ماددەیە بۆ جەستە بە ئاسانی دەتوانێت زۆرێک لە کێشەکانی پێست چارەسەر بکات، ڕێگری لە پیری پێشوەختە بکات و پێستت بە گەنجی و تەندروستی ڕابگرێت.
کات بەفیڕۆ مەدە و هەر ئێستا بۆ دەستپێکردن، پەرداخێک ئاو بۆ خۆت تێبکە، تەنانەت ئەگەر تینووشت نییە! دڵنیابە پێستت لە داهاتوودا سوپاست دەکات.
تۆ ڕۆژانە چەند پەرداخ ئاو دەخۆیتەوە؟ ئایا کاریگەرییەکەت لەسەر پێستت بینیوە؟ لە کۆمێنت بۆمان بنووسە!
